MSHINDI wa pili shindano la Maisha Plus 2012, Venance Mushi
aliyekuwa akiwakilisha Mkoa wa Dodoma, amechukua fomu ya kushiriki
shindano la Big Brother Africa 2013.
Akizungumza na Tanzania Daima kwa njia ya simu jana, Venance alisema
kuwa, ameamua kuchukua fomu hiyo ili kujaribu nafasi ya kuiwakilisha
Tanzania kwenye shindano hilo, kutokana na uwezo alionao, ikiwemo wa
kuzungumza lugha zaidi ya tatu na kipaji chake.
“Tayari nimeishachukua fomu na nimeshaijaza, natarajia kuirudisha muda
wowote kuanzia sasa, naomba wadau waniombee ili kuweza kupita katika
usaili hapo baadaye,” alisema Venance.
Pia aliongeza kuwa, uwezo alioonesha Maisha Plus 2012, umempa umaarufu
mkubwa, huku akiahidi kufanya vizuri endapo atapata nafasi hiyo mwaka
huu.
Venance ambaye ni msomi wa elimu ya juu katika masuala ya mipango na
maendeleo, aliyosomea Chuo cha Mipango Dodoma, alionesha kiwango cha
hali ya juu kwenye shindano la Maisha Plus, ikiwemo kuyazoea maisha ya
kijijini na ubunifu ambao ulimfanya kupata mali na fedha nyingi.
Aidha, mbali na Venance, tayari mastaa wengine wameshajitokeza kuchukua
fomu za kushiriki shindano hilo akiwemo aliyekuwa Miss Tanzania 2006 na
muigizaji wa filamu, Wema Sepetu.
Fomu hizo zimeanza kutolewa katika ofisi za Dstv na kwa njia ya mtandao wa kampuni ya Multichoice Tanzania.
0 maoni:
Post a Comment